Непалда Tara Air авиакомпаниясига тегишли самолёт ҳалокатга учраган жойда барча 23 нафар қурбоннинг жасади топилди. Бу ҳақда Indian Express нашри маълумотига таяниб, «РИА Новости» хабар беради.
Авиаҳалокат қурбонлари орасида икки нафар чет эллик – Хитой ва Кувайт фуқаролари ҳам бўлган.
Нашрнинг маълум қилишича, жасадларнинг еттитаси шахсини аниқлаш учун Покхара шаҳридаги шифохонага етказилган. Қолган қурбонларнинг жасади ҳам ўша шифохонага етказилади.
Мамлакат ҳукумати ҳалокат сабабларини аниқлаш учун махсус комиссия ташкил этиш тўғрисида буйруқ берди. Ҳалокатга об-ҳаво шароитларининг сабаб бўлганлиги дастлабки тахминлардан бири ҳисобланмоқда. Комиссия 90 кундан кейин текширув натижалари бўйича ҳисоботни тақдим этиши лозим.
Эслатиб ўтамиз, аввалроқ ҳалокат ҳудудидан 20 кишининг жасади топилганлиги ҳақида маълум қилинган эди.
Изоҳ (0)