Bellingcat халқаро тадқиқот гуруҳи Украина шарқида Малайзиянинг Boeing MH17 самолёти уриб туширилиши борасидаги янги фактлар ошкор этилган ҳисоботни эълон қилди, деб хабар беради Meduza.
Ҳужжатда айтилишича, самолёт Россиянинг 53-зенит-ракета бригадаси ҳарбий хизматчилари томонидан «Бук» ускунаси ёрдамида уриб туширилган.
Бригаданинг 2-дивизиони ҳарбий хизматчилари ижтимоий тармоқларда 2014 йилнинг июлида Россия—Украина чегарасида бўлганини тасдиқлайдиган суратларни жойлаштирган.
Ҳисоботнинг интернетда чоп этилган версиясида ҳарбий хизматчиларнинг шахсий маълумотлари ва фотосуратлари ўзгартирилган. Тўлиқ маълумотлар MH17 рейси ҳалокати билан шуғулланаётган Халқаро тергов гуруҳига (JIT) тақдим этилган.
Гуруҳ мутахассислари самолётни уриб туширишга алоқадор бир неча ҳарбий хизматчининг номини келтирди. Шунга қарамай, таъкидланишича, жиноятни ким ижро этганидан қатъий назар, «MH17 йўловчиларини Россия қуролли кучлари ва, афтидан, россиялик ҳарбийлар томонидан тақдим этилган қурол ёрдамида ҳалок қилиш учун жавобгарлик Россия Федерацияси мудофаа вазирлиги ва Қуролли Кучлар Олий бош қўмондони Владимир Путин зиммасидадир».
Эслатиб ўтамиз, олдинроқ ҳам Bellingcat тадқиқот жамоаси Нидерландияга Донецк яқинида Малайзиянинг «Боинг»и қулашига алоқадор деб тахмин қилинаётган россиялик ҳарбийлар исм-шарифлари кўрсатилган маърузани топширган эди.
Изоҳ (0)