Футзал бўйича Осиё чемпионати финалида Ўзбекистон ва Эрон терма жамоалари ўртасида кечган баҳсдан сўнг матбуот анжуманида эронликлар бош мураббийи Муҳаммад Нозим ва Али Асқар Хасанзода иштирок этди, деб ёзади «Sports.uz».
– Авваламбор, турнирни юқори даражада ўтказиб берган ташкилотчиларга миннатдорчилик билдириб ўтаман. Сўнгги йилларда авлодлар алмашинуви сабаб Осиё чемпиони бўлолмаётган эдик. Бу йил клублар ўртасида ҳам, аёллар ўртасидаги қитъа биринчилигида ҳам ҳамюртларим муваффақиятли иштирок этди. Мусобақа аввалидан чемпионлик нафасини ҳис қилгандик. Турнир давомида кўрдикки, йилдан йилга терма жамоалар мавқеи ўсиб бормоқда. Ўзбекистон терма жамоасининг ўйинларини алоҳида таъкидлаб ўтмоқчиман. Чемпионат давомида бизни қўллаб-қувватлаган мухлисларга ташаккур. Биз бу ерда ўзимизми ўз уйимиздагидек ҳис қилдик, – деди эронликлар бош мураббийи Муҳаммад Нозим.
Эрон футзал терма жамоаси аъзоси Али Хасанзода (мусобақанинг энг яхши ўйинчиси) ҳам ўз фикрларини билдириб ўтди.
– ОФК ташкилотчиларига ҳамда Ўзбекистон аҳлининг илиқ меҳмондорчилигига миннатдорчилик билдираман. Ўзбекистонда ўтказилган ушбу турнир ширин хотиралар билан ёдимда қоладиган бўлди. Ўйинчи сифатида бу чемпионат мен учун муҳим эди. Мусобақанинг энг яхши ўйинчиси бўлишимга қарамай, жамоанинг ғалабаси мен учун муҳимроқ саналади. Энг яхши ўйинчи бўлишимда жамоадошларимнинг хизмати катта.
– Мусобақада фақат Ўзбекистон терма жамоаси Эронга жиддий қаршилик кўрсата олди. Нега бундай деб ўйлайсиз?
– Энг аввало, икки жамоанинг бир-бирига яқин ўйин кўрсатганини айтиб ўтишим керак. Ўзбекистон футзал терма жамоаси анча ўсганини кўриш мумкин. Ўзбекистоннинг ажойиб ўйин кўрсатишида мухлисларнинг хизмати катта. Улар бутун баҳс давомида қойилмақом даражада жамоани қўллаб-қувватлаб турди. Биз бундай ҳолатга Бразилия Гран-присида ҳам тушгандик. Бундай вазиятларда кўп гол уришдан кўра, ўйинни назорат қилиш афзалроқ.
– Финалдан олдин мусобақадаги энг яхши ўйинимизни кўрсатамиз дегандингиз. Ўзбекистонга қарши ўйинда шундай бўлдими?
– Тан олиш керак, биз энг яхши ўйинимизни намойиш қила олмадик. Бундан ҳам яхшироқ ўйин кўрсатган кунларимиз бўлган.
Эслатиб ўтамиз, Тошкентда ўтказилган футзал бўйича Осиё чемпионати финалида Эрон 2:1 ҳисобида Ўзбекистондан устун келди.
Изоҳ (0)