Futzal bo‘yicha Osiyo chempionati finalida O‘zbekiston va Eron terma jamoalari o‘rtasida kechgan bahsdan so‘ng matbuot anjumanida eronliklar bosh murabbiyi Muhammad Nozim va Ali Asqar Xasanzoda ishtirok etdi, deb yozadi “Sports.uz”.
– Avvalambor, turnirni yuqori darajada o‘tkazib bergan tashkilotchilarga minnatdorchilik bildirib o‘taman. So‘nggi yillarda avlodlar almashinuvi sabab Osiyo chempioni bo‘lolmayotgan edik. Bu yil klublar o‘rtasida ham, ayollar o‘rtasidagi qit’a birinchiligida ham hamyurtlarim muvaffaqiyatli ishtirok etdi. Musobaqa avvalidan chempionlik nafasini his qilgandik. Turnir davomida ko‘rdikki, yildan-yilga terma jamoalar mavqyei o‘sib bormoqda. O‘zbekiston terma jamoasining o‘yinlarini alohida ta’kidlab o‘tmoqchiman. Chempionat davomida bizni qo‘llab-quvvatlagan muxlislarga tashakkur. Biz bu yerda o’zimizmi o‘z uyimizdagidek his qildik, – dedi eronliklar bosh murabbiyi Muhammad Nozim.
Eron futzal terma jamoasi a’zosi Ali Xasanzoda (musobaqaning eng yaxshi o‘yinchisi) ham o‘z fikrlarini bildirib o’tdi.
– OFK tashkilotchilariga hamda O‘zbekiston ahlining iliq mehmondorchiligiga minnatdorchilik bildiraman. O‘zbekistonda o‘tkazilgan ushbu turnir shirin xotiralar bilan yodimda qoladigan bo‘ldi. O‘yinchi sifatida bu chempionat men uchun muhim edi. Musobaqaning eng yaxshi o‘yinchisi bo‘lishimga qaramay, jamoaning g‘alabasi men uchun muhimroq sanaladi. Eng yaxshi o‘yinchi bo‘lishimda jamoadoshlarimning xizmati katta.
– Musobaqada faqat O’zbekiston terma jamoasi Eronga jiddiy qarshilik ko‘rsata oldi. Nega bunday deb o‘ylaysiz?
– Eng avvalo, ikki jamoaning bir-biriga yaqin o‘yin ko‘rsatganini aytib o‘tishim kerak. O‘zbekiston futzal terma jamoasi ancha o‘sganini ko‘rish mumkin. O‘zbekistonning ajoyib o‘yin ko‘rsatishida muxlislarning xizmati katta. Ular butun bahs davomida qoyilmaqom darajada jamoani qo‘llab-quvvatlab turdi. Biz bunday holatga Braziliya Gran-prisida ham tushgandik. Bunday vaziyatlarda ko‘p gol urishdan ko‘ra, o‘yinni nazorat qilish afzalroq.
– Finaldan oldin musobaqadagi eng yaxshi o‘yinimizni ko‘rsatamiz degandingiz. O’zbekistonga qarshi o’yinda shunday bo‘ldimi?
– Tan olish kerak, biz eng yaxshi o‘yinimizni namoyish qila olmadik. Bundan ham yaxshiroq o‘yin ko‘rsatgan kunlarimiz bo’lgan.
Eslatib o‘tamiz, Toshkentda o‘tkazilgan futzal bo‘yicha Osiyo chempionati finalida Eron 2:1 hisobida O‘zbekistondan ustun keldi.
Izoh (0)