Россиянинг Москва шаҳридаги Домодедово аэропортининг асосий эгаси Дмитрий Каменшик 2011 йилда юз берган теракт асосида қўзғатилган жиноят иши бўйича ўн йилгача озодликдан маҳрум бўлиши мумкин. Бу ҳақда терговчи берган маълумотларга асосан «РИА Новости» хабар қилмоқда.
Москвадаги Басманний судининг суд мажлисида иштирок этган терговчининг таъкидлашича, Каменшик ўн йилгача озодликдан маҳрум бўлиши мумкин ва у жазо хавфи остида қочишга ҳаракат қилиши эҳтимоли бор.
Дастлаб, Россия Тергов қўмитаси тадбиркорни ҳибсга олишни сўраб судга илтимоснома киритган эди. Суд мажлисида аниқланишича, илтимоснома чақириб олиниб, Каменшикка нисбатан уй қамоғи эҳтиёт чорасини қўллаш билан чегараланиб қолиш сўралган.