Хонанда Тамила: Худди менга ўхшайдиган қизни топиб, видеога тушириб, сўнг тарқатишган

Хонанда Тамила (Эсмеральда Раҳматова) интернетда тарқалиб, шов-шувларга сабаб бўлган ахлоқсиз видеоларнинг бирида ўзи акс этгани ҳақидаги аввалги изоҳини рад этди. Бу ҳақда «Даракчи» газетаси хабар бермоқда.

«Биласизми, шаънимга шунчалар кўп эътироз ёғилдики, охири кўринмаяпти. Лекин иккита видеодаги қиз ҳам мен эмасман. Бу менда хусумати бор одамларнинг иши, деб биламан. Худди менга ўхшайдиган қизни топиб, тасвирга тушириб, тарқатиб юборишган», — деди Тамила.

Шов-шувли видеолар тарқалган илк кунларда Тамила «Sayyod.com»га берган интервьюсида видеоларнинг бирида ўзи тасвирланганини тан олганди.

«Ўша куни ‘Sayyod.com’ сайтидан Сардор Комилов қўнғироқ қилиб, ‘Иккита видеодаги сизми?’, деб сўради ва у нима ҳақида гапираётганини тушунтирмади. Ўзининг лойиҳаларидаги видеоларни назарда тутаётгандир, деган ўйда: ‘Ҳа, биттасидаги менман’, деганман. Очиғи, ўша дамда нима бўлаётганини тушунмай тургандим», — деди хонанда.

«Даракчи» газетаси сўровига кўра, «Sayyod.com» сайти Тамила билан бўлган қўнғироқ аудиоёзувини тақдим этган. Унда Сардор Комиловнинг: «Ҳаммаёқда шов-шув. Иккита видео тарқалган?», — деган савол оҳангидаги гапига, Тамила: «Жуда яхши, иккинчиси меники эмас, биринчисидаги менман», — деб жавоб берган. Изоҳ сўралганида, Тамила: «Йўқ, изоҳлай олмайман», — деган.

Бир муддат аввал Тамила деб тахмин қилинаётган қизнинг ахлоқсиз ҳаракатлари акс этган видеоёзув мессенжерларда тарқалиб кетганди. Шундан сўнг хонанданинг продюсери Нажот Агзамов у билан шартномани бекор қилди, «Ўзбекнаво» эстрада бирлашмаси эса хонанданинг лицензиясини тугатди.

• Тамила: Тошкентдаман, ҳеч қаерга қочиб кетганим йўқ! (видео)