«Ўзбекнаво» эстрада бирлашмаси яқин вақт ичида хонанда Тамиланинг интернетда тарқалиган номаъқул видеоси юзасидан катта йиғилиш ўтказади. Бу ҳақда бирлашманинг лицензия бўлими бошлиғи Одил Абдуқаҳҳоров «Даракчи» газетасига маълум қилди.
Одил Абдуқаҳҳоровнинг фикрича, санъаткорларнинг маънавиятини ошириш бўйича махсус чоралар кўриш шарт.
«Яна бир ҳолат: Instagram’да хонандалар Лола (Йўлдошева) ва Азиза Низомова ҳамкасби (Тамила)нинг хатти-ҳаракатини қўллаб-қувватлаяпти. Бу уят-ку! Тамилани тартибга чақириш ўрнига, аксинча, тарафкашлик қилишяпти», — дейди «Ўзбекнаво» вакили.
«Яқин кунларда шу масала юзасидан катта йиғилиш ўтказишни режалаштирганмиз. Унда нафақат бу икки хонанда, балки бошқа санъаткорлар иштироки ҳам кўзда тутилган. Уларга бундай беҳаёликни қўллаб-қувватлашни қатъиян ман қиламиз», — деди Одил Абдуқаҳҳоров.
Эслатиб ўтамиз, аввалроқ Тамила иштирокидаги номаъқул видео интернетда тарқалиб кетган, шундан сўнг хонанда Лола Йўлдошева унинг тарафини олиб, Instagram’даги саҳифасида пост қолдирганди.
Изоҳ (0)