Ўтган йил ярмидан буён Twitter 125 мингта аккаунтни терактлар ҳақида таҳдид қилгани ва терроризмни тарғиб этгани учун ёпиб қўйди, деб ёзади Rambler News Service компания корпоратив блогига таяниб. Уларнинг кўпчилиги ИШИД фаолияти билан боғлиқ бўлган.
Компания маълум қилишича, Twitter фойдаланувчилар шикоятларини кўриб чиқувчи ходимлари штатини кенгайтирди, бунинг ҳисобига жавоб бериш вақти қисқарди. Бундан ташқари, компания экстремизм тарқалиши масаласида ҳуқуқни ҳимоя қилиш органлари билан «зарур бўлган вақтда» ҳамкорлик қилишини айтди.
«Ўз фикрини баён қилиш учун очиқ платформа сифатида, биз ўз қоидаларимиз, ҳуқуқни ҳимоя қилиш органларининг қонуний талабларини амалга ошириш ва фойдаланувчиларга ўз фикрлари билан эркин тарзда ўртоқлашиш имкониятини бериш ўртасидаги мувозанатни сақлашимиз керак. Шундай фикрлар борки, уларни баъзи кишилар маъқулламаслиги ёки ҳақоратли деб ҳисоблаши мумкин», — дейилади компания баёнотида.
Twitter ушбу қийинчиликларга қарамай, экстремизмга қарши курашдек муҳим масалага ечим топиш учун қўлидан келганча ҳаракат қилишини айтди.
Изоҳ (0)