Ўзбекистон Марказий сайлов комиссиясининг 3 февраль куни бўлиб ўтган мажлисида Олий Мажлис Қонунчилик палатаси депутати Рашид Маткурбановнинг ваколатини муддатидан илгари тугатиш масаласи кўриб чиқилди. Бу ҳақда МСК матбуот хизмати хабар бермоқда.
Хабар беришларича, Рашид Маткурбановнинг берган аризасига асосан, комиссия унинг Олий Мажлис Қонунчилик палатаси депутати ваколатини муддатидан аввал тугатиш ҳақида қарор қабул қилди.
Маълумот учун, 1977 йилда туғилган Рашид Маткурбанов 6-Чимбой сайлов округидан Олий Мажлис Қонунчилик палатасига сайланган эди. Мутахассислиги бўйича ҳуқуқшунос ҳисобланган Рашид Маткурбанов палатанинг Мудофаа ва хавфсизлик масалалари қўмитаси аъзоси эди.
«Ўзбекистон Республикаси Олий Мажлисига сайлов тўғрисида»ги қонуннинг 47-моддасига мувофиқ, МСК айрим депутатларнинг ваколатларини ҳақиқий эмас деб топган тақдирда, шунингдек депутат чақириб олинган, бошқа сабабларга кўра депутатлик ваколатлари муддатидан олдин тугатилган ҳолларда тегишли сайлов округларида янги сайлов ўтказилади.
Изоҳ (0)