Сурия ва унга қўшни мамлакатларда вужудга келган фавқулодда вазият туфайли ГФР ҳукумати БМТнинг қочоқлар масаласи бўйича бошқармасига қўшимча 500 миллион евро ажратиш ниятида. Бу ҳақда ГФР канцлери Ангела Меркель Лондонда бўлиб ўтадиган молиявий донорлар конференциясида маълум қилишни режалаштирмоқда, деб хабар беради «Корреспондент.net».
Бир қатор мамлакатлар, жумладан, Германиянинг таклифига биноан Лондонда 70 дан ортиқ давлатнинг вакиллари тўпланади. Учрашувда Суриядаги фуқаролик урушининг қурбонлари тақдирини енгиллаштириш учун пул маблағларини жалб этиш йўллари муҳокама этилади.
БМТнинг ҳисоб-китобларига қараганда, жаҳон ҳамжамияти ушбу мақсад учун жами 7 миллиард евродан ортиқ маблағ ажратиши лозим.
Бундестагнинг ташқи сиёсат комиссияси раиси Норберт Рёттген бошқа мамлакатларни ҳам Сурияга зудлик билан ёрдам кўрсатишга чақирди.