Ўзбекистонлик 42 нафар «Йилнинг энг яхши чет тили ўқитувчиси» кўрик-танлови ғолиблари шу йилнинг 8—22 январь кунлари Буюк Британиянинг нуфузли олий ўқув юртида малака ошириб қайтди. Бу ҳақда Ўзбекистон Республикаси Халқ таълими вазирлиги Ахборот хизмати «Дарё»га хабар берди.
Халқ таълими вазирлиги ва Буюк Британиянинг St. Mark & St. John университети ўртасида тузилган икки томонлама шартнома асосида малака ошириш учун Буюк Британиянинг Девон графлиги, Плимут шаҳри яқинида жойлашган нуфузли St. Mark & St. John университети танланди.
Машғулотлар университетнинг тажрибали мутахассислари ва профессорлари томонидан олиб борилди.
Тажриба алмашиш давомида ўзбекистонлик ўқитувчилар дарс ўтишнинг турли усулларини, жумладан кичик гуруҳларда ишлаш, ўқитишнинг коммуникацион методларидан фойдаланиш, муаммоли вазиятларда чет тилида мулоқотга киришиш усуллари иборалар ва ролли ўйинлар орқали ўргатилди.
Шунингдек, тажриба алмашиш давомида ўзбекистонлик инглиз тили ўқитувчилари Плимут шаҳридаги тил ўргатиш марказлари ва мактабларга сафар уюштириб, у ерда «Ўзбекистоннинг маданияти ва урф-одатлари», «Таълим тизими» каби мавзуларда тақдимот қилди.
Ўқувлар якунида барча иштирокчиларга сертификатлар берилди. Мазкур 42 нафар малака ошириб қайтган ўқитувчилар таянч мактаблар базасида чет тили ўқитувчилари учун жорий йилнинг март—декабрь ойларида ўтказиладиган ўқувларда тренер сифатида иштирок этади ҳамда чет элда олган билим ва кўникмаларини ҳамкасбларига ўргатади.
Изоҳ (0)