Хитойга реклама ролигида суратга тушиш учун ташриф буюрган «Барселона» ҳужумчиси Лионель Месси билан кутилмаган ҳолат юз берди. Бу ҳақда «Sports.ru» хабар бермоқда.
Аргентиналик тасвирга олишдаги танаффус чоғида маҳаллий ўсмирлар футбол жамоасига боришга рози бўлди. Буни кенг ёритган телекомпаниялар продюсерлари фикрича, дунё футболи суперюлдузининг машғулот базасига келиши ёш тарбияланувчиларни ҳайратга солиши керак эди. Кутилмаганда улар сафида бўлган Мадриднинг «Реал» жамоаси ишқибози Месси билан саломлашишдан бош тортди. Фақат мураббийининг илтимосидан кейингина «қаймоқранглилар» рамзи туширилган футболка кийган Ли Во истар-истамас Леонинг қўлини қисиб қўйди.
Хитой телевидениеси орқали мазкур репортаж намойиш этилгач, афсонавий футболчига нисбатан ҳурматсизлик кўрсатгани учун Ли Во кескин танқид остида қолди. Ўсмир эса «Реал» мухлиси эканлиги, бироқ ўзининг қилмишидан афсусда эканлигини билдирди.
«Месси олдида кечирим сўрашни истардим. Бу одобдан эмаслигини биламан. Футбол юлдузи бўлишга интилаётган эканман, буни келгусида инобатга оламан ва камчиликларимни йўқотишга ҳаракат қиламан», — дея таъкидлаган Ли Во.
Изоҳ (0)