Ўзбекистонлик теннисчи Жўрабек Каримов ўсмирлар ўртасидаги Австралия Очиқ чемпионатининг финалига чиқди, деб хабар беради «Sports.uz».
Мусобақанинг ярим финалида 17 ёшли ўзбекистонлик теннисчи австралиялик Алекс Де Минаурга қарши кортга чиқди. Деярли икки соат давом этган мазкур беллашувда Ўзбекистон вакили 3:6, 6:4, 6:3 ҳисобида иродали ғалабани қўлга киритди.
Ўсмирлар ўртасидаги Австралия Очиқ чемпионати бош соврини учун Жўрабек Каримов австралиялик Оливер Андерсон ва кореялик Юн-Сон Чон учрашуви ғолибига қарши баҳс юритади.
Эслатиб ўтамиз, бунгача Жўрабек илк даврада АҚШ вакили Эзикел Кларкни 6:1, 6:3, иккинчи босқичда гонконглик Энтони Тангни 6:4, 6:4, учинчи даврада кореялик Чанг-Ён Охни 6:4, 6:2, чорак финалда япониялик Йосуки Ватанукини 6:3, 6:2 ҳисобида мағлуб этганди.
2015 йилда Австралия Очиқ чемпионатининг ярим финалигача етиб келган Жўрабек Каримов ўтган йилги натижасини яхшилашга муваффақ бўлди.
Изоҳ (0)