Гуля қизалоғи, у чалинган хасталик ҳақида гапириб бераяпти, кўзларидан эса ёш тўкилиб, аста-аста юзидан оқиб тушмоқда. «Қизим Шодия йиғлашимни эшитмасин ва кўз ёшимни кўрмасин» деб, она аста, овоз чиқармай йиғлашга ўрганган.
Шодия Олжабаева февралда уч ёшга тўлади. Гуля шуни айтиб, «Худо хоҳласа», деб қўшиб қўяди. Қизининг келажаги ҳақида гапирганда гапни доим «Худо хоҳласа» деб бошлайди. Чақалоқ муддатидан аввал, вазни атиги 1600 грамм бўлиб туғилди. Бир парча бахт... Устига-устак, қизалоққа туғруқхонадаёқ Фалло тетрадаси — «кўк хасталик» деб аталувчи, ўзида бирданига тўрт аномалияни мужассам этган юрак касаллиги ташхиси қўйилди. Митти бир юракда тўрт аномалия...
Ҳар минг чақалоқнинг 6—8 нафарида туғма юрак хасталиклари учраб туради. Янги туғилган ва бир ёшгача бўлган болалар ўлимининг сабаблари орасида айнан шундай хасталиклар биринчи ўринда туради. Хасталик қанча эрта аниқланса, унча шу даражада вақтли ва муваффақиятли даволашга умид сақлаб қолинади. Агар касаллик вақтида операция қилинса, бола мутлақ соғлом улғайишига имконият туғилади.
Ҳали уч ёшга тўлмаган Шодиянинг юрагидаги соғлом юракда бўлмайдиган тешик 4 ммдан 10 ммгача кенгайиб кетди. Оила фарзанднинг ҳаёти узилмаслиги учун зарур бўлган жарроҳлик амалиётини қолдиришга мажбур бўлаётганди — қизалоқ тез-тез касал бўлар, анемия ва вазни енгиллигидан азият чекарди. Бунинг бари шундай ташхис қўйилган болаларга хос. Лекин, тиббий тақиқловлардан ташқари, болани бир ўзи боқаётган она ўтолмайдиган тўсиқ ҳам бор эди. Очиқ юракда жарроҳлик ўтказиш учун жуда қиммат бўлган оксигенатор — сунъий қон айлантириш аппаратидан ўтаётган пайтда қонни кислород билан таъминловчи мослама зарур. Пойтахтнинг Юнусобод мавзесида истиқомат қиладиган Гуля кўринишидан ўзи ҳам ҳали ёш болага ўхшайди, лекин аслида фарзандини ёлғиз ўзи тарбиялаётган она ва ёлғиз аёл. Онаси ундан юз ўгирган, ҳатто неварасини ҳам тан олмайди ва ҳар қандай ёрдамдан бош тортган. Муштипар онага маҳалла ҳам ёрдам бермаган, чунки унинг пропискаси ҳам муаммоли. Бўш вақтида парда тикиб тирикчилик қилади. Лекин оғир касалликка чалинган қизалоқнинг онасида қанча ҳам бўш вақт бўлиши мумкин...
Ўзбекистонда болаларни операция қилиш ва даволаш бепул, лекин ҳозирча давлат юрак операциясига муҳтожларнинг барчасини оксигенаторлар билан таъминлаб беролмайди. Шодия Олжабаевага омад кулиб боқди — унга «Сочная долина» савдо маркаси 2015 йилда ўтказган «Бирга ҳаётларни қутқарамиз!» акциясидан тушган пул маблағи ҳисобига оксигенатор олинди. Ноябрь ойида сотилган шарбатнинг ҳар бир қутисидан тушган пулнинг бир қисми оғир касаликка чалинган болаларнинг операцияларига йўналтирилди. Акция доирасида 15 болакайни операция қилиш учун етарли маблағни йиғишга муваффақ бўлинди. Пул шундай операцияларни ўтказувчи Тошкент педиатрия институтининг клиникаси ҳисоб-рақамига ўтказилди. Шифокорлар ўз беморларини улар туғилган ёки юрак хасталиги аниқланган кундан бери танийди, уларнинг оилавий аҳволидан, ота-оналариниг имкониятларидан ҳам бохабар, шу сабабли ҳам айнан шифокорлар операцияга ўта муҳтож бўлган кам таъминланган оилаларнинг 15 нафар фарзандини операцияга тавсия этди.
Шодиянинг онаси Гуля яна ойна олдида йиғламоқда, лекин энди унинг юзида табассум. Кардиожарроҳ Дониёр Пирназаровнинг айтишича тўрт соатлик операция муваффақиятли ўтди ва энди Шодия соғайиб кетишига шубҳа йўқ.
«Булар бахт кўз ёши, энди мен яшашни истайман...», — дейди у ва: «Раҳмат, раҳмат, ёрдам берганларнинг барига раҳмат!..», — деб тўхтамай шивирлайди.
Бу «Биргаликда ҳаётларни қутқарамиз!» акцияси доирасидаги ўн бешта «юрак» ҳикоялариниг иккинчиси ва буларнинг давоми бор.
Реклама ҳуқуқи асосида. Маҳсулот сертификатланган
Изоҳ (0)