Тошкент шаҳрида 25 январь, душанба куни ҳаво ҳарорати +17,2 даражагача кўтарилиб, 1963 йилда ўрнатилган рекордни янгилади. Бу ҳақда «Ўзгидромет» ахборот бермоқда.
Хабар беришларича, 2016 йил 25 январь куни Тошкент шаҳрида ўртача ҳаво ҳарорати +10,6 даражани ташкил этган, кундузи +17,2 даражагача кўтарилган.
Тошкентда 25 январь тарихидаги бундан аввалги энг иссиқ ҳарорати 1963 йилда қайд этилган бўлиб, ўшанда ҳаво ҳарорати +16,3 даражагача кўтарилган эди.
Таққослаш учун, 2016 йил 25 январь куни Самарқанд шаҳрида ҳаво ҳарорати +17,6 даражагача (рекорд 1966 йилда ўрнатилган — +18 даража), Термизда +17,4 даражагача (рекорд 1963 йилда ўрнатилган — +21,3 даража), Нукусда +4,3 даражагача (рекорд 1963 йилда ўрнатилган — +14,2 даража) кўтарилди.
2016 йил январь ойининг аксарият кунларида Ўзбекистон бўйлаб илиқ иқлим шароити ҳукмронлик қилди. Бундан аввал Термиз, Самарқанд, Нукус шаҳарларида ҳам ҳаво ҳароратининг илиқлиги бўйича янги рекордлар ўрнатилгани ҳақида хабар берилган эди.
26 январдан Ўзбекистонда ҳаво ҳарорати пасайиши, 27—30 январь кунлари эса мунтазам ёғингарчилик кузатилиши, баъзи жойларда вақти-вақти билан қор ёғиши кутилмоқда.
Изоҳ (0)