«Kitobim.uz» сайти Android қурилмалари учун электрон китоблар сотишни йўлга қўйди. Бу ҳақда «Ziyouz.uz» хабар бермоқда.
Android смартфонлар учун мўлжалланган Kitobim мобил дастури орқали «Академнашр» нашриёти китобларининг электрон версиясини сотиб олиш мумкин.
Дастурнинг янги версияда телефон орқали рўйхатдан ўтиш имконияти бор, шунингдек, Click, MBANK тизимлари орқали ҳисобни тўлдириб, китоблар сотиб олиш мумкин.
Мобил дастурда «Кутубхона», «Рукнлар», «Мажмуалар», «Муаллифлар», «Машҳур китоблар» бўлимлари мавжуд. Китоб ва муаллиф номини қидирувга бериб, электрон китобни топиш мумкин.
Ҳозирги вақтда дастур орқали ўзбек тилидаги 51 та китобни сотиб олиш, 300 дан ортиқ китобни қулай ҳолатда бепул мутолаа қилиш, онлайн ва офлайн режимда фойдаланиш имкони мавжуд.
2012 йилдан бери фаолият юритаётган Kitobim лойиҳаси ўзбек тилида замонавий қурилмалар учун электрон китобларни жамлаш ва китобхонларга қулай ўқиш имкониятини яратишни ўз олдига мақсад қўйган.
Шунингдек, муаллифларга ўз ижод намуналарини қонуний асосда электрон тарзда тақдим этиш эвазига маълум даражада моддий манфаат олишларига кўмаклашиш, китобхонларга сифатли, қулай ва замонавий электрон китобларни сотиб олишлари учун ёрдам бериш ҳам лойиҳа маслакларидандир.
Изоҳ (0)