Футбол бўйича Ўзбекистон олимпия термаси Олимпиада йўлланмаси учун курашдан чиқди (видео)

Футбол бўйича Ўзбекистон олимпия терма жамоаси Рио—2016 Олимпиадаси йўлланмаси учун курашни тўхтатди. Самвел Бабаян шогирдлари 16 январь куни U-23 Осиё чемпионати гуруҳ босқичи 2-турида Ироқ термасига 2:3 ҳисобида имкониятни бой берди.

Ироқ терма жамоасига ғалаба келтирган голлар Амжад Аттван Козим (38-дақиқа), Маҳди Комил (43-дақиқа) ва Ҳумам Тариқ (82-дақиқа) ҳисобига ёзилди.

Ўзбекистон олимпия терма жамоаси 1-дақиқадаёқ ҳисобни очганига қарамай (гол муаллифи — Достонбек Ҳамдамов), ҳатто дуранг натижани ҳам сақлаб қола олмади (Ўзбекистоннинг иккинчи голи 79-дақиқада Темур Ҳакимов ҳисобига ёзилди).

https://www.youtube.com/watch?v=PLSdRyg2S3k

Мусобақа гуруҳ босқичи 1-турида Ўзбекистон олимпия терма жамоаси Жанубий Кореяга 1:2 ҳисобида мағлуб бўлганди. Шундай қилиб, Жанубий Корея ва Ироқ терма жамоалари муддатидан аввал чорак финал босқичига йўл олди.

U-23 Осиё чемпионати гуруҳ босқичи 3-турида Ўзбекистон олимпиячилари дастлабки икки ўйинда жавобсиз еттита гол ўтказиб юборган Яманга қарши майдонга тушади. Учрашув 19 январь, сешанба куни Тошкент вақти билан 21:30 да бошланади.U-23 Осиё чемпионати«C» гуруҳи, 2-тур учрашуви

Ўзбекистон — Ироқ 2:3 (1:2)Голлар: Амжад Аттван Козим (38), Маҳди Комил (43), Ҳумам Тариқ (82) — Достонбек Ҳамдамов (1), Темур Ҳакимов (79).

• U-23 Қатар—2016. Ўзбекистон — Ироқ 2:3. Онлайн