Жакартадаги портлашлар, Тошкентдаги олтинчи зилзила, Ўзбекистон олимпия термаси учун маълумотнома ва куннинг бошқа муҳим янгиликлари

14 январнинг муҳим янгиликлари — «Дарё»нинг кечки дайжестида.

1. Отабек Мусаев «Ўзбеккино» бош директори этиб тайинланди. Биз Отабек Мусаев ўйнаган фильмлар галереясини тайёрладик — асосан хусусий киностудияларнинг маҳсулотлари тўпланди.

2. Индонезия пойтахтидаги портлашлар оқибатида қурбон бўлганлар сони 7 кишига етди. Жакартадаги портлашлар — куннинг энг муҳим воқеаларидан бири бўлди. Жакарта билан боғлиқ барча янгиликлар — алоҳида хабарлар оқимида.

3. Тошкент шаҳрида ерости силкинишлари сезилди. 2015 йилнинг октябрида йил бошидан бери неча марта зилзила бўлгани ҳақида каттароқ материал ва зилзила ўзи нималиги ҳақида савол-жавоб тайёрлагандик. Ўшанда атиги олти зилзила ҳақида ёзгандик. 2016 йилнинг энг биринчи ойининг ҳали ярми тўлиқ тугамасидан, олтинчи зилзила юз бериб бўлди.

4. Путин ва Обама КХДРнинг водород бомбаси синовига қатъий реакция билдиришга чақирди. Шимолий Кореянинг водород бомбасидан кейин лойқаланган сув, бахтга қарши, ҳали ҳам тингани йўқ.

5. U-23 Осиё чемпионатининг регламентига кўра чорак финалга кимлар чиқади? Ўзбекистон олимпия терма жамоаси U-23 Осиё чемпионатини мағлубият билан бошлади ва, анъанага кўра, сўнгги ўйиннинг сўнгги сонияларига қадар кейинги босқичга чиқиш имконига эга бўлади.