Surayyo Ermatova: Abdumo‘min O‘tbosarov 28-dekabr kuni qo‘ygan imzo bilan mehnat ta’tiliga chiqdim
O‘zbekiston Milliy teleradiokompaniyasi suxandonlar bo‘limida 22 yil davomida marhum Abdumo‘min O‘tbosarov bilan birga mehnat qilgan taniqli suxandon Surayyo Ermatovaning so‘zlariga ko‘ra, 1-yanvarga o‘tar kechasi vafot etgan Abdumo‘min O‘tbosarov hech qachon salomatligidan, jumladan, yuragidan shikoyat qilgan emas.
“31-dekabr kuni, soat 14:00 ga yaqin ishga kelganimda, Abdumo‘min aka birdan o‘zini yomon his qilgani, shundan keyin kasalxonaga olib ketishgani haqida aytishdi, biroq aynan nima bo‘lganini baribir tushunmadik. Shunday keyin kadrlar bo‘limiga bordim — mehnat ta’tiliga chiqishim haqida ariza yozishim kerak edi, arizaga esa aynan Abdumo‘min akaning imzosi bo‘lishi kerak edi”, — dedi Surayyo Ermatova “Daryo” muxbiri bilan suhbatda.
O‘zMTRKdagi suxandonlar boshlig‘i sifatida faoliyat olib borgan Abdumo‘min O‘tbosarov, mehnat ta’tillari jadvali tuzilayotgani munosabati bilan, 28-dekabr kuni Surayyo Ermatovaga qo‘ng‘iroq qilgan. Surayyo Ermatova undan o‘z imzosi qo‘yilgan bir varaq qog‘ozni qoldirishni so‘ragan, Abdumo‘min O‘tbosarov o‘sha kuni Surayyo Ermatova ariza yozadigan qog‘ozga imzo qo‘yib, stolida qoldirgan.
“31-dekabr kuni men Abdumo‘min akaning so‘nggi imzosi bilan o‘z arizamni kadrlar bo‘limiga topshirganim keyin ma’lum bo‘ldi”, — dedi Surayyo Ermatova.
Surayyo Ermatovaning xotirlashicha, Abdumo‘min O‘tbosarov haqiqiy ustoz, jonkuyar inson edi, har doim, har vaqt o‘z hamkasblarini qo‘llab-quvvatlar, ularga yordam berishga harakat qilar, qo‘l ostidagi xodimlarning tashvishlari haqida o‘ylab, qayg‘urardi, maslahat ko‘rinishida bo‘lsa-da ko‘mak berishga intilardi.
“Abdumo‘min aka shunchaki tilla odam edi. U bizni xuddi o‘z farzandlaridek ko‘rardi. Uning o‘limidan so‘ng biz xuddi yetimdek qoldik”, — deya qo‘shimcha qildi Surayyo Ermatova.
Eslatib o‘tamiz, Abdumo‘min O‘tbosarovning hayotdan ko‘z yumgani 2016-yil 1-yanvarda ma’lum bo‘ldi. Uning o‘limiga yurak xuruji sabab bo‘lgan.
Go‘zal O‘tbosarova: Abdumo‘min akani tongda ishga kuzatganimcha, qaytib ko‘rmadim
Abdumo‘min O‘tbosarov farzandlarining to‘yida boshlovchilik qilish niyatida edi
