Ўзбекистонлик синоптиклар 2015 йилда мамлакатда кузатилган об-ҳаво борасидаги хулосалар билан бўлишди, шунингдек, қишнинг илиқ ҳароратига қандай омиллар сабаб бўлаётганини тушунтириб берди, деб ёзади «Даракчи».
Вазирлар Маҳкамаси ҳузуридаги Гидрометеорология маркази бош синоптиги Ирина Зайцева Тошкент обсерваторияси маълумотларига таяниб, Тошкент учун 2015 йил метеокузатувларда энг иссиғи бўлмагани, у 2004-рекорд йилдан бироз ортда қолаётганини таъкидлади. Ўртача йиллик ҳарорат 2015 йилда Цельсий бўйича 15,8 даражага тенг бўлди, бу 2004 йилдагидан 0,1 даражага паст.
2015 йилнинг аҳамиятли томони тўрт мавсумда ҳам иқлим меъёридан илиқроқ бўлди, энг сезиларли фарқ (+2,7 даража) қиш мавсумига тўғри келди. Шунингдек, 2015 йилнинг аҳамиятли ҳаво аномалияси март охиридаги совуқлар бўлди. Гап шундаки, март ойининг сўнгида ҳамма жойда дарахтлар гуллаган бир вақтда Урал туманларидан кескин совуқ ҳаво кириб келди. 29—31 март кунлари республиканинг барча ҳудудларида қор ёғди. Ҳарорат кечаси 2—7 даража совуқ бўлди. Бу сўнгги 50 йилдаги энг совуқ март бўлди. 30—31 март кунлари республиканинг аксарият ҳудудларида метеокузатувлар тарихидаги энг паст ҳарорат қайд этилди.
2016 йилнинг январи бошларида эса Ўзбекистон ҳудудида 2015 йилнинг декабрь ойида қайд этилган юқори ҳарорат сақланиб қолмоқда. Бундай илиқ ҳавонинг сабаби – атмосферадан жанубий-ғарбий оқимнинг устунлик қилаётгани ва у билан чет жануб ҳудудларидан республика ҳудудига илиқ ва нам ҳавонинг кириб келаётганидир.
Изоҳ (0)