2015 йилда фарзандли бўлган ўзбекистонлик машҳурлар

2015 йилда фарзандли бўлган машҳурлар рўйхати билан танишинг — улар орасида биринчи марта оналик бахтига эришганлар ҳам, ниҳоят ўғил фарзандли бўлганлар ҳам, фарзандига ўз тахаллусини қўйганлар ҳам бор.

«Афруз» гуруҳи аъзоси Музаффар

«Афруз» гуруҳи хонандаларидан бири Музаффар 2015 йил 9 февраль куни ота бўлди. Чақалоққа Иброҳим деб исм қўйилди.

Актриса Севара Солиева

24 апрель куни актриса Севара Солиева она бўлди — чақалоққа Султонбек деб исм қўйилди. «Кўз тегмасин, жуда тўполончи, бунинг устига, қизиқмаган нарсаси йўқ. Эмакласа ҳам, ортидан қувиб етолмайсиз», — дейди Севара ўз фарзанди ҳақида.

Раққоса Паризода

Раққоса Паризода 20 июль куни иккинчи бор она бўлди — қизалоққа Сабрина деб исм қўйилди.

Актриса Ҳосият Ҳусанова

1 сентябрь куни 47 ёшли актриса Ҳосият Ҳусанова иккинчи бор она бўлди. Ўғил фарзандга Имронбек деб исм берилди. «Каттам 17 ёшда. У ёшлигида фарзанд кўришни истагандим, аммо Аллоҳ менга шу ёшимда фарзандли бўлишимни насиб этган экан», — деди Хосият Ҳусанова

Хонанда Рухшона

6 сентябрь куни хонанда Рухшона она бўлди — янги туғилган чақалоқнинг исми Ҳабиба бўлди. «Ҳали қизалоғим жуда кичик, бошини кўтариб, атрофни кузатишни, гапирсангиз, кулишни ўрганди. Қўшиқ айтсам, жон қулоқлари билан тинглайди», — дейди хонанда «7х7» газетасига берган интервьюсида.

Актриса Муқаддас Саъдуллаева

Таниқли актёрлар — Лутфулла ва Гулчеҳра Саъдуллаевларнинг қизи Муқаддас Саъдуллаева 11 сентябрь куни қиз фарзандли бўлди. Унга Мубина деб исм берилди. «Ҳали кичик бўлса-да, ўғил болалардек тўполончи. Эътиборни яхши кўради», — дейди актриса.

«Беном» гуруҳи аъзоси Комил

19 сентябрь куни «Беном» гуруҳи аъзоси хонанда Комил қиз фарзандли бўлди.

Хонанда Сардор Раҳимхон

Таниқли хонанда Сардор Раҳимхон икки қиздан сўнг ўғилли бўлди — 9 октябрь куни туғилган болакайга Муҳаммад Али деб исм берилди.

Хонанда Дилдора Ниёзова

Сардор Раҳимхон ўғилли бўлган кун бошқа бир хонанда — Дилдора Ниёзова иккинчи бор она бўлди. Қиз фарзандга Муслимахон деб исм берилди. «2015 йилда барча орзум амалга ошди», — деди хонанда қизалоғи туғилганини назарда тутиб.

Хонандалар Фаррух Раимов ва Дилсўз

Йилнинг энг шов-шувли ота-оналари: хонанда Фаррух Раимов ва унинг турмуш ўртоғи, Дилсўз тахаллуси билан ижод қилувчи хонанда Гўзал Жуманиёзова-Раимова тантанали тўй маросимига олти ой тўлар-тўлмас — 18 октябрь куни ота-она бўлди. Бу ҳолат турли гап-сўзларга сабаб бўлди. Бундан ташқари, Дилсўзнинг туғруқхонадаги ҳолати акс этган суратларнинг тарқалиб кетиши яна алоҳида шов-шув бўлди.

Актёр Ҳусан Жўраев

Актёр ва телебошловчи Ҳусан Жўраев 28 октябрда қизли бўлди. Унга Азиза деб исм қўйишди.

Хонанда Ботир Яминов

5 ноябрь куни хонанда Ботир Яминов оиласида қиз фарзанд дунёга келди. Қизалоққа Odinа исми берилди.

Актриса ва хонанда Мадина Мумтоз

Мадина Мумтоз 12 ноябрь куни иккинчи марта она бўлди. Санъаткорнинг икки ярим яшар ўғли — Муҳаммадюсуфнинг энди Муҳаммадюнус исмли укаси бор. «Турмуш ўртоғим билан маслаҳатлашиб, унга акасиникига уйқаш исм қўйдик», — дейди санъаткор «7х7» газетасига берган интервьюсида.

Футболчи Игнатий Нестеров

Футбол бўйича Ўзбекистон миллий терма жамоаси ва Тошкентнинг «Локомотив» футбол клуби дарвозабони Игнатий Нестеров хонадонида 18 ноябрь куни ўғил фарзанд дунёга келди. Бу болакайнинг уч опаси бор.