Кеча, 2 январь куни «Навбаҳор» ўйингоҳида Наманган футболи тарбияланувчиси, айни пайтда Россиянинг «Краснодар» клуби аъзоси Одил Аҳмедов ёш футболчилар билан учрашди. Бу ҳақда «Навбаҳор» ФК матбуот хизмати хабар бермоқда.
Ўйингоҳдаги мажлислар залида ўтказилган учрашувда Наманган вилоят ҳокими Хайрулло Бозоров, Наманган вилоят ҳокимлигининг Маданият ва спорт ишлари бошқармаси бошлиғи Расулжон Низамбаев, Наманган шаҳар ҳокими, «Навбаҳор» футбол клуби президенти Баҳодир Бекходжаев, «Навбаҳор» футбол клуби вице-президенти Олимжон Қосимов ва ОАВ вакиллари ҳам қатнашди.
Учрашувда Наманган вилоят фахри бўлган Одил Аҳмедовга Наманган шаҳрида фаолият юритаётган 15-сонли футбол мактаб-интернати ва «Навбаҳор-Умид» футбол мактабининг иқтидорли тарбияланувчилари ўзларини қизиқтирган саволлари билан мурожаат қилди. Шунингдек ёш футболчиларга эсдалик совғалари ҳам топширилди.
Одил Аҳмедов фаолияти давомида рўй берган қизиқарли воқеалар ҳақида гапириб берди. Учрашув сўнгида Аҳмедов майдонга чиқиб, ёш футболчиларга тўп билан ишлашдаги маҳоратини намойиш этди.
Изоҳ (0)