БМТ Инсон ҳуқуқлари бўйича олий комиссари Зайд Раад ал-Ҳусайн Саудия Арабистони ҳукуматини мамлакатда ўлим жазосига нисбатан мораторий қўллашга чақирди. Бу ҳақда тарқатилган баёнотга асосан «ТАСС» хабар қилмоқда.
«Қиролликда 47 кишига, шу жумладан шиа уламоси Нимр ан-Нимрга нисбатан чиқарилган ўлим ҳукми ижро этилганлиги тўғрисидаги хабарлардан чуқур таассуфдаман», ― дея таъкидлади олий комиссар.
Ал-Ҳусайн 2015 йилда шайх Нимр ан-Нимрга нисбатан ўлим жазоси тайинланганлиги муносабати билан Саудия Арабистони ҳукуматига хат билан мурожаат қилганлигини эслатиб ўтди.
Шунингдек, баён қилинишича, халқаро ҳуқуққа асосан, қасддан содир этилган қотиллик каби энг оғир жиноятлар учунгина ўлим жазосини қўллаш мумкин. Бундан ташқари, ишни кўриб чиқишда адолатли судлов жараёни ва ошкора суд мажлиси кафолатланган бўлиши лозим.
Ал-Ҳусайн Саудия Арабистони ҳукуматини барча қўлланилган ўлим жазоларига нисбатан мораторий жорий этишни ҳамда терроризмга қарши курашишда муқобил стратегияларни ишлаб чиқишда БМТ ва бошқа ҳамкорлар билан биргаликда ишлашга чақирди.
Эслатиб ўтамиз, Саудия ҳукумати шиалар хатиби Нимр ан-Нимрни қатл қилгани маълум бўлганидан сўнг, Теҳронда намойишчилар Саудия Арабистони элчихонасига бостириб кирди. Шундан кейин Саудия Арабистони Эрон билан дипломатик алоқалар узилганини эълон қилди.
Изоҳ (0)