Исроил Олий суди собиқ бош вазир Эхуд Ольмертнинг коррупция иши бўйича берган апелляциясини қисман қаноатлантирди. Бу ҳақда «Jpost.com» нашри берган маълумотларга асосан «ТАСС» хабар қилмоқда.
«Эхуд Ольмертнинг 2014 йилдаги порахўрлик иши бўйича унга қўйилган айблов хулосасига нисбатан берган апелляция шикояти 24 декабрь, пайшанба куни Олий суд томонидан қисман қанотлантирилган бўлсада, у Исроил тарихида қамоққа олинган илк бош вазир бўлади», ― дейди манба.
Таъкидланишича, суд Ольмертнинг 500 минг шекель (128 минг доллардан зиёдроқ) миқдорида пора олганлиги ҳақидаги айбловни олиб ташлаб, 60 минг шекель (15300 доллар) миқдорида пора олганликда айблади.
«Натижада, Ольмерт бошда ҳукм қилинган олти йил озодликдан маҳрум бўлиши ўрнига 18 ой қамоқда ўтириб чиқади», ― дея маълум қилинди.
Ольмерт белгиланган жазони 2016 йил 15 февралдан бошлаб ўтай бошлайди.
Эслатиб ўтамиз, Қуддус суди Эхуд Ольмертни бошқа бир коррупция иши бўйича саккиз ойга озодликдан маҳрум қилиш жазоси ҳамда 25 минг доллар миқдорида жарима тўлашни тайинлаган эди.
Изоҳ (0)