UNCITRAL халқаро арбитраж суди Oxus Gold компаниясининг (Буюк Британия) Ўзбекистон ҳукуматига қарши даъвосини рад этди. Бу ҳақда «Газета.uz» хабар бермоқда.
2011 йилда Ўзбекистон ҳукумати корхонани ривожлантириш дастури ва олтин ишлаб чиқаришни кўпайтиришнинг самарадорлиги пастлиги туфайли Oxus Gold 50% улушга эга бўлган «Амантайтау Голдфилдз» қўшма корхонасини тугатиш тўғрисида қарор қабул қилди. 2013 йили Oxus Gold халқаро арбитражга ҳукуматнинг мазкур қарорига қарши даъво киритди. Британия компанияси, шунингдек, ҳукуматнинг 2006 йили Хандиза конидаги қазиш ишларига эксклюзив ҳуқуқдан маҳрум этиш қарорига нисбатан ҳам даъво киритганди. Ушбу кон ўша йилнинг ўзида Олмалиқ тоғ-металлургия комбинати ихтиёрига берилди. Oxus Gold кўрилган зарарни 400 миллион доллар баҳолади.
21 декабрь, душанба куни арбитраж суди Oxus Gold’нинг «Хандиза» лойиҳаси бўйича даъвосини тўлиқ рад этди. Шунингдек, компаниянинг «Амантайтау Голдфилдз» қўшма корхонаси юзасидан даъвоси ҳам қаноатлантирилмади.
Изоҳ (0)