23 декабрь, чоршанба куни Ўзбекистон Республикаси Ташқи ишлар вазирлигида Нидерландия қироллиги ташқи ишлар вазирлигининг Европа департаменти директори Дафне Бергсма бошчилигидаги делегация билан учрашув бўлиб ўтди. Бу ҳақда вазирлик матбуот хизмати хабар бермоқда.
Ўзбекистон—Нидерландия сиёсий маслаҳатлашувларининг биринчи раунди доирасида турли соҳалардаги ҳамкорликни мустаҳкамлашга оид масалалар батафсил муҳокама қилинди. Учрашувда томонларни қизиқтирган халқаро ва минтақавий муаммолар юзасидан ҳам фикр алмашилди.
Олдинроқ Нидерландия томони Ўзбекистон Олий Мажлиси Сенати ва Ташқи иқтисодий алоқалар, инвестициялар ва савдо вазирлигида ҳам музокаралар ўтказганди. Ушбу музокаралар давомида парламентлараро алоқаларнинг ҳозирги ҳолати, ривожлантириш истиқболлари, савдо-иқтисодий ва инвестиция соҳаларидаги ҳамкорликни кенгайтириш, хусусан, Ўзбекистон иқтисодиётига илғор технологиялар жалб қилиш ва қўшма ишлаб чиқаришни йўлга қўйиш тўғрисида сўз юритилди.
Изоҳ (0)