Тошкентда 2-йўналиш бўйлаб ҳаракатланувчи автобуснинг қоидабузар ҳайдовчисига нисбатан маъмурий жазо чоралари қўлланилди. Бу ҳақда Facebook’даги «Водители Ташкента (Drivers.uz)» гуруҳида хабар қолдирилган.
Гуруҳ аъзоси 15 ноябрь куни автомобиль регистраторига олинган видеоёзувни тармоққа жойлаштирди. Унда Осиё кўчаси бўйлаб ҳаракатланаётган давлат рақами 01 651 JAA, йўналиш рақами 2 бўлган автобус, светофорнинг тақиқловчи қизил чироғи ёнган вақтда тўхташ ўрнига, Йўл ҳаракати қоидаларига зид равишда йўлнинг қарама-қарши қатнов қисмига чиқиб, тўхтаб турган автомобилларни қувиб ўтган ва ўз йўлида давом этган.
Ушбу ҳолатга гувоҳ бўлган фойдаланувчи Тошкент шаҳар ИИББ Йўл ҳаракати хавфсизлиги бошқармасига мурожаат қилган. Бошқарма жавобида қайд этилган ҳолат юзасидан суриштирув олиб борилгани, Йўл ҳаракати қоидаларини бузган ҳайдовчи аниқлангани ва унга нисбатан маъмурий чоралар қўлланилгани маълум қилинган.
Маълумот учун, Ўзбекистон Маъмурий жавобгарлик тўғрисидаги кодекси 1284-моддаси 1-қисмига мувофиқ, светофорнинг тақиқловчи сигналига бўйсунмасдан ўтиш энг кам иш ҳақининг икки баробари миқдорида (21 декабрь ҳолатига кўра, 260 480 сўм), 1285-моддаси 2-қисмига кўра, йўлнинг қарама-қарши ҳаракатланиш учун мўлжалланган томонига ёки бўлагига йўл ҳаракати қоидаларини бузган ҳолда чиқиши энг кам иш ҳақининг ўн баробари миқдорида (21 декабрь ҳолатига кўра, 1 302 400 сўм) жарима солинишига сабаб бўлади.
Гуруҳдаги мазкур видеохабар остида 70 дан ортиқ фикр қолдирилган. Фойдаланувчиларнинг аксарияти автобус ҳайдовчисини жиддий танқид остига олган, бундай ҳайдовчилар йўловчилар ҳаётини хавф остига қўйишини таъкидлаган.
Айни вақтда, бир гуруҳ фойдаланувчилар мазкур ҳолатга ҳазил билан ёндашиб, бу Сандра Буллок иштирокидаги «Тезлик» фильмидан лавҳа экани, автобус рулида Сандра Буллокнинг ўзи бўлганини ёзган.
Изоҳ (0)