Луис Суарес клублар ўртасидаги ЖЧнинг энг яхши футболчиси деб топилди

«Барселона» форварди Луис Суарес клублар ўртасидаги жаҳон чемпионатида бешта тўп киритиб, рекорд ўрнатди, деб хабар қилади «Корреспондент.net».

Уругвайлик ҳужумчи ярим финалдаги «Гуанчжоу Эвергранд» билан ўйинда хет-трикка эришган бўлса, «Ривер Плейт»га қарши баҳсда дубл қайд этди. Бу вақтгача ҳеч бир футболчи клублар ўртасидаги ЖЧда 5 та тўп киритмаган эди.

Бундан ташқари, Суарес ушбу мусобақа тарихида хет-трик қайд этган биринчи футболчига айланди.

Финал ўйини якунига етганидан сўнг уругвайлик футболчи клублар ўртасидаги жаҳон чемпионатининг энг яхши футболчиси сифатида олтин тўп билан тақдирланди.

Эслатиб ўтамиз, финалда «Ривер Плейт»дан 3:0 ҳисобида ғалаба қозонган «Барселона» 3 карра жаҳон чемпионига айланди.