Енгил атлетика федерациялари халқаро ассоциацияси (IAAF) собиқ президенти Ламин Диак Россия енгил атлетика федерацияси собиқ раҳбари Валентин Балахничевни россиялик енгил атлетикачилар допингдан фойдаланганини яшириш учун пора берганликда айблади. Бу ҳақда Le Monde манбаларига таяниб, «Sovsport.ru» хабар бермоқда.
«Россия спортчиларида четлатилиш эҳтимоли билан боғлиқ муаммолар бор эди. Биз уларга Россиядан кўмак олиш эвазига ёрдам беришга рози бўлдик. Балахничев ҳаммасини ташкиллаштирди, молиявий масалалар билан эса Папа Массата Диак (Ламиннинг ўғли) шуғулланди. Ўртамизда ёзма келишув бўлмаган. Мен сайловларда ғолиб чиқиш учун 1,5 миллион евро керак бўлишини айтдим. У ‘муаммо йўқ, бу масалани ечишга ҳаракат қиламиз’ деди», — дея маълум қилган Диак.
Эслатиб ўтамиз, Бутунжаҳон антидопинг агентлиги (WADA) мустақил комиссияси Россияни антидопинг қоидаларини бузишда айблаб, IAAF’га Россия федерацияси фаолиятини тўхтатиш, шунингдек, россиялик енгил атлетикачиларни IAAF шафелигидаги мусобақалар, жумладан, Рио-де-Жанейродаги Олимпиада ўйинларидан четлатишни тавсия қилган.
Изоҳ (0)