Тошкент шаҳрида йўловчи машинада унутиб қолдирилган 1,5 миллион сўмлик телефон аппарати эгасига қайтиб келди. Бу ҳақда, воқеанинг ҳақиқий иштирокчиси бўлган қиз Facebook’даги «Потребитель.уз» гуруҳида ёзиб қолдирган.
Маълум бўлишича, қиз қўлида 1,5 миллион сўмлик телефон аппарати билан йўловчи машиналардан бирига ўтирган, иш жойига кириб келганидан сўнг, аслида поччасига тегишли қурилмани машинада унутиб қолдирганини англаган. Қиз иш куни тугагунга қадар ҳайдовчи қайтиб келишига умид қилган.
Бу воқеадан унинг ҳамкасблари ҳам хабар топган. Эртаси куни ҳамкасбларидан бири эрталабдан қўнғироқ қилиб, телефон қолиб кетган машинага ўтирганини айтган. «Қурилмангизни кўриб турибман, фақат менга бермас эканлар», — деб, ҳамкасб аёл ҳайдовчининг телефон рақамини олган.
Маълум бўлишича, ҳайдовчининг ўзи ҳам машина салонидан телефонни топганидан сўнг, «10 маротаба» қизнинг офисига келиб кетган.
«Ишончингизни асранг ва ишончингизни мустаҳкамланг! Орамизда қалби пок, ҳалол, самимий инсонлар кўп, фақат бунга соф ишонч ила ишонинг! Мана ўша инсон», — дея, қиз 1,5 миллион сўмлик телефонни қайтариб берган ҳайдовчининг машинаси суратини илова қилган.
Қиз бўлган воқеани ҳикоя шаклида, учинчи шахс номидан ёзган ва матн нисбатан катта кўриниш олган, шунга қарамасдан, кўпчилик уни охиригача ўқиб чиққанини хабар остида қолдирилган фикрлардан билса бўлади.
Хусусан: «Мана шу одам қайтариб берди, деса бўлмайдими, бир километр қилиб ёзмасдан», — деб қолдирилган ҳазилнома комментнинг ўзи 56 та лайк тўплаган.
Телефони қайта топилган фойдаланувчининг бу хабарини реклама сифатида талқин қилган фойдаланувчилар ҳам топилган. Аксарият фойдаланувчилар воқеа яхши баён этилгани, ҳаётда яхши инсонлар кўплиги ҳақида фикр билдирган.
Изоҳ (0)