Россиянинг ядровий қалқони (фотогалерея)

Россиянинг стратегик аҳамиятдаги ракета қўшинлари — мамлакат стратегик ядровий қўшинларининг асосий бўғинидир. «Газета.ru»нинг хабар беришича, 1959 йил 17 декабрь куни ташкил этилган ушбу қўшин 12 ракета дивизиясидан ташкил топган.

Доимий жанговар шай ҳолатда турадиган мазкур қўшинлар таркибидаги дивизиялар сонини 2020 йилга бориб, «Баргузин» жанговар темирйўл ракета мажмуалари ҳисобидан, 13 тага етказиш кўзда тутилган.

«Топол» RT-2ПМ қитъалараро баллистик ракетаси 1985 йил июлидан бери жанговар навбатчиликда турибди. У 10,5—11 минг километр масофадаги нишонни ура олади. 2021 йилда «Топол» ҚБРлари ўрнини янги — «Ярс» ва «Ярс-М» мажмуалари эгаллайди.

«Ярс» стратегик ракетаси 2009 йили фойдаланишга қабул қилинган бўлиб, 11 минг километр масофадаги нишонни ура олади. «Топол»дан фарқли ўлароқ, «Ярс»лар ажралувчи бош қисми билан таъминланган бўлиб, бу қисм, турли маълумотларга кўра, уч ёки тўртта жанговар ядровий блокни ўз ичига олган.

«Воевода» Р-36М2 — украиналик муҳандислар томонидан ишлаб чиқилган, 15 минг километргача масофада бўлган душман позицияларини йўқ қила оладиган ракета. Бу ракета ўрнига ундан ҳам кучлироқ «Сармат» ракеталари ишлаб чиқилган бўлиб, 2018—2019 йилларда дивизияларга етказиб берилиши бошланади.

Россия армияси 1994 йилга қадар фойдаланган ядровий «арвоҳ-поезд» — Жанговар темирйўл ракета мажмуаси (ЖТРМ). Бугунги кунда мазкур лойиҳа қайта ишга туширилган бўлиб, «Баргузин» номи остида янги поезд ишлаб чиқилмоқда. Дастлабки намунаси 2018 йилда ҳарбийларга бериладиган поезддан 2040 йилгача фойдаланилади.

«Капустин Яр» синов полигони — Россиянинг Астрахан вилояти шимоли-ғарбидаги ҳарбий ракета полигони. Дастлабки совет баллистик ракеталарини синаш учун 1946 йили ташкил этилган. Ҳозирги кунда ракета синовлари учун ягона илмий-тадқиқот мажмуаси ҳисобланади.

Қозоғистондаги Саришаған полигони — ракетага қарши қуролларни ишлаб чиқиш ва синаш бўйича Евроосиёдаги биринчи ва ягона полигон. Қарағанда ва Жамбул вилоятлари ҳудудидаги чўл ҳудудда жойлашган, Россия Мудофаа вазирлиги томонидан ижарага олинган.

Қайд этиш жоиз, Россия томонидан синов тариқасида учириладиган баллистик ракеталар Ўзбекистон осмонида ҳам кўриниб туради.