Rossiyaning yadroviy qalqoni (fotogalereya)
Rossiyaning strategik ahamiyatdagi raketa qo‘shinlari — mamlakat strategik yadroviy qo‘shinlarining asosiy bo‘g‘inidir. “Gazeta.ru”ning xabar berishicha, 1959-yil 17-dekabr kuni tashkil etilgan ushbu qo‘shin 12 raketa diviziyasidan tashkil topgan.
Doimiy jangovar shay holatda turadigan mazkur qo‘shinlar tarkibidagi diviziyalar sonini 2020-yilga borib, “Barguzin” jangovar temiryo‘l raketa majmualari hisobidan, 13 taga yetkazish ko‘zda tutilgan.
“Topol” RT-2PM qit’alararo ballistik raketasi 1985-yil iyulidan beri jangovar navbatchilikda turibdi. U 10,5—11 ming kilometr masofadagi nishonni ura oladi. 2021-yilda “Topol” QBRlari o‘rnini yangi — “Yars” va “Yars-M” majmualari egallaydi.
“Yars” strategik raketasi 2009-yili foydalanishga qabul qilingan bo‘lib, 11 ming kilometr masofadagi nishonni ura oladi. “Topol”dan farqli o‘laroq, “Yars”lar ajraluvchi bosh qismi bilan ta’minlangan bo‘lib, bu qism, turli ma’lumotlarga ko‘ra, uch yoki to‘rtta jangovar yadroviy blokni o‘z ichiga olgan.
“Voyevoda” R-36M2 — ukrainalik muhandislar tomonidan ishlab chiqilgan, 15 ming kilometrgacha masofada bo‘lgan dushman pozitsiyalarini yo‘q qila oladigan raketa. Bu raketa o‘rniga undan ham kuchliroq “Sarmat” raketalari ishlab chiqilgan bo‘lib, 2018—2019-yillarda diviziyalarga yetkazib berilishi boshlanadi.
Rossiya armiyasi 1994-yilga qadar foydalangan yadroviy “arvoh-poyezd” — Jangovar temiryo‘l raketa majmuasi (JTRM). Bugungi kunda mazkur loyiha qayta ishga tushirilgan bo‘lib, “Barguzin” nomi ostida yangi poyezd ishlab chiqilmoqda. Dastlabki namunasi 2018-yilda harbiylarga beriladigan poyezddan 2040-yilgacha foydalaniladi.
“Kapustin Yar” sinov poligoni — Rossiyaning Astraxan viloyati shimoli-g‘arbidagi harbiy raketa poligoni. Dastlabki sovet ballistik raketalarini sinash uchun 1946-yili tashkil etilgan. Hozirgi kunda raketa sinovlari uchun yagona ilmiy-tadqiqot majmuasi hisoblanadi.
Qozog‘istondagi Sarishag‘an poligoni — raketaga qarshi qurollarni ishlab chiqish va sinash bo‘yicha Yevroosiyodagi birinchi va yagona poligon. Qarag‘anda va Jambul viloyatlari hududidagi cho‘l hududda joylashgan, Rossiya Mudofaa vazirligi tomonidan ijaraga olingan.
Qayd etish joiz, Rossiya tomonidan sinov tariqasida uchiriladigan ballistik raketalar O‘zbekiston osmonida ham ko‘rinib turadi.
