Ўзбекистон Республикаси Фавқулодда вазиятлар вазирлиги ҳудудий бошқармалари мутахассислари томонидан аҳоли орасида табиий ва ис газидан заҳарланишнинг олдини олишга қаратилган тадбирлар ўтказмоқда. Бу ҳақда ФВВ матбуот хизмати хабар бермоқда.
Мазкур тадбирлар, рейдлар ўтказиш, табиий ва ис газининг инсон саломатлиги ва ҳаёти учун хавфлилик даражаси тўғрисида аҳоли орасида тушунтириш ишларини олиб боришни ўз ичига олади.
Бу каби тадбирларнинг ўтказилиши қиш мавсумида, яъни об-ҳавонинг кескин пасайганида аҳоли орасида иситиш мосламаларидан, турли ёқилғилардан кенг фойдаланишга бўлган эҳтиёжнинг ортиши билан боғлиқ.
Рейдлар давомида 2 мингдан ортиқ ностандарт, сифати кафолатланмаган газ ва бошқа иситиш ускуналарини сотиш ҳамда улардан нотўғри фойдаланиш ҳолатлари аниқланди.
Оқибатда 50 миллион сўмдан ортиқ маъмурий жарима қўлланилиб, 3 мингдан ортиқ ностандарт газ ва бошқа иситиш мосламалари сотувдан чиқариб ташланди. Мазкур ҳолатлар бўйича вилоят, туман (шаҳар) ҳокимликларига 296 та тақдимномалар киритилди.
Шу билан биргаликда, аҳоли орасида табиий ва ис газидан заҳарланишнинг олдини олишга қаратилган суҳбатлар 166 минг маротоба ўтказилган, 460 мингдан ортиқ эслатма ва буклетлар тарқатилган ва матбуотда 1,5 мингга яқин чиқишлар амалга оширилган. Бу каби тадбирлар «Ўзтрансгаз» АК, Ички ишлар, Соғлиқни сақлаш вазирликлари, маҳалла фаоллари, «Камолот» ЁИҲ ва Ўзбекистон Қизил Ярим Ой Жамияти кўнгиллилари билан ҳамкорликда олиб борилмоқда. Ҳамкорликдаги тадбирлар қамрови 378 минг шахсий ҳовли, 24,6 минг кўп қаватли уйлар ва улардаги 1,1 миллион хонадонни ташкил этди.
Бундан ташқари, Фавқулодда вазиятлар вазирлиги газ мосламаларидан фойдаланишда эҳтиёт бўлишга чорловчи SMS-хабарларни фуқароларнинг мобил телефонига юбормоқда.
Изоҳ (0)