Американинг Warner/Chappell Music овоз ёзиш студияси дунёдаги энг машҳур қўшиқлардан бири — Happy Birthday to You («Туғилган кунинг билан») муаллифлик ҳуқуқи билан боғлиқ суд баҳсини бартараф этди. Бу ҳақда Лос-Анжелес суди томонидан тарқатилган баёнотда маълум қилинган, дея хабар беради «Корреспондент.net».
Баҳс 2013 йилда, ушбу қўшиқ ҳақида ҳужжатли фильм олаётган Good Morning to You Productions кинокомпанияси Warner/Chappell Music студиясига қарши даъво қўзғаганда бошланганди. Мазкур даъвода Happy Birthday to You жамоатчилик мулки эканлиги, шу сабаб студия томонидан қўшиқнинг омма олдида ижро этилиши ёки фильмларга саундтрек сифатида фойдаланилиши учун ҳақ талаб қилиниши ноқонуний эканлиги билдирилган.
Сентябрда федерал судья Жорж Кинг даъвогарнинг талабини қондириб, овоз ёзиш компанияларининг қўшиқ учун муаллифлик ҳуқуқи сифатида ажратмалар ундиришга ҳақи йўқлиги тўғрисида ҳукм чиқарди. Мутахассислар ҳисоб-китобига кўра, баъзан бундай ажратмалар суммаси йилига 2 миллион долларга борган. Чиқарилган ҳукм Good Morning to You Productions ва бошқа даъвогарларга Warner/Chappell Music студиясидан йирик миқдорда тўлов талаб қилишга имкон берарди, бироқ суд ҳужжатларига кўра, томонлар ўзаро келишувга эришган. Унинг шартлари ошкор этилмаган бўлса-да, Happy Birthday to You бундан сўнг расман жамоат мулки ҳисобланиши ва уни ижро этилгани учун ҳеч қандай ажратмалар тўланмаслигини англатади.
Қўшиқ 1893 йилда Луисвилл шаҳрилик (Кентукки штати) мактаб ўқитувчилари Пэтти ва Милдред Хилл томонидан ёзилган бўлиб, ўша йилнинг ўзида унга бўлган ҳуқуқ Клейтон Самми томонидан сотиб олинган. 1998 йилда Warner/Chappell Music Саммига алоқадор бўлган Birch Tree компаниясини сотиб олгач, қўшиққа бўлган барча ҳуқуқлар қонун бўйича унга ўтганлигини маълум қилган.
Изоҳ (0)