Шимолий Корея етакчиси Ким Чен Ин «Моранбонг» қизлар поп-гуруҳини Пекинга бир ҳафталик гастрол сафарларига жўнатишга қарор қилди, дея хабар беради «Газета.ru».
Пхеньян шу тариқа БМТ Хавфсизлик кенгаши КХДРда инсон ҳуқуқлари бузилишини муҳокама этадиган мажлиси арафасида ўзининг асосий иттифоқдоши билан муносабатларни яхшилаш ниятида. Инсон ҳуқуқлари фаоллари БМТ Ким Чен Инни халқаро судга беришига умид қилмоқда, Хавфсизлик кенгашида тақиқ ҳуқуқига эга Хитой эса Шимолий Корея етакчисини бундай қисмат кутмаслигининг ягона кафолати бўлса ажаб эмас.
2012 йили шахсан Ким Чен Иннинг кўрсатмаси билан ташкил этилган «Моранбонг» гуруҳида 21 нафар қиз бор. Жанубий Кореядаги кўпсонли жамоалардан фарқли равишда, гуруҳ иштирокчилари созларни ўзи чалади.
Ундан ташқари, қизлар ҳарбий унвонларга эга ва мухлислар олдида ҳам асосан ҳарбий либосларда чиқади. Шундай экан, мазкур гуруҳни поп-жамоа эмас, ҳарбий оркестр деб ҳам аташ мумкин.
