Amerikaning Warner/Chappell Music ovoz yozish studiyasi dunyodagi eng mashhur qo‘shiqlardan biri — Happy Birthday to You (“Tug‘ilgan kuning bilan”) mualliflik huquqi bilan bog‘liq sud bahsini bartaraf etdi. Bu haqda Los-Anjeles sudi tomonidan tarqatilgan bayonotda ma’lum qilingan, deya xabar beradi “Korrespondent.net”.
Bahs 2013-yilda, ushbu qo‘shiq haqida hujjatli film olayotgan Good Morning to You Productions kinokompaniyasi Warner/Chappell Music studiyasiga qarshi da’vo qo‘zg‘aganda boshlangandi. Mazkur da’voda Happy Birthday to You jamoatchilik mulki ekanligi, shu sabab studiya tomonidan qo‘shiqning omma oldida ijro etilishi yoki filmlarga saundtrek sifatida foydalanilishi uchun haq talab qilinishi noqonuniy ekanligi bildirilgan.
Sentabrda federal sudya Jorj King da’vogarning talabini qondirib, ovoz yozish kompaniyalarining qo‘shiq uchun mualliflik huquqi sifatida ajratmalar undirishga haqi yo‘qligi to‘g‘risida hukm chiqardi. Mutaxassislar hisob-kitobiga ko‘ra, ba’zan bunday ajratmalar summasi yiliga 2 million dollarga borgan. Chiqarilgan hukm Good Morning to You Productions va boshqa da’vogarlarga Warner/Chappell Music studiyasidan yirik miqdorda to‘lov talab qilishga imkon berardi, biroq sud hujjatlariga ko‘ra, tomonlar o‘zaro kelishuvga erishgan. Uning shartlari oshkor etilmagan bo‘lsa-da, Happy Birthday to You bundan so‘ng rasman jamoat mulki hisoblanishi va uni ijro etilgani uchun hech qanday ajratmalar to‘lanmasligini anglatadi.
Qo‘shiq 1893-yilda Luisvill shahrilik (Kentukki shtati) maktab o‘qituvchilari Petti va Mildred Xill tomonidan yozilgan bo‘lib, o‘sha yilning o‘zida unga bo‘lgan huquq Kleyton Sammi tomonidan sotib olingan. 1998-yilda Warner/Chappell Music Sammiga aloqador bo‘lgan Birch Tree kompaniyasini sotib olgach, qo‘shiqqa bo‘lgan barcha huquqlar qonun bo‘yicha unga o‘tganligini ma’lum qilgan.
Izoh (0)