SMS-хабарлар охирига қўйилган нуқта қабул қилиб олувчида носамимийлик тасаввурини уйғотади ва у юборувчининг гапларига ишонмайди. АҚШнинг Бингемтон университети психологлари эксперимент ўтказиб, шундай хулосага келди, деб ёзади «Корреспондент.net».
Экспериментда 126 нафар талабага икки кишининг SMS кўринишидаги диалогини ўқиттиришди. Бунда юборувчининг хабари таклиф маъносидаги савол (масалан, «Дейв менга ортиқча чипта берди. Сен ҳам борасанми?») ва унга розилик маъносидаги жавоб («Албатта» ёки «Окей»)дан иборат бўлди. Жавоблар икки хил вариантда: нуқтали ва нуқтасиз ҳолда тақдим этилди.
Экспериментнинг барча иштирокчилари нуқтали хабарларни энг носамимий деб топди.
«SMS-хабарлар жонли мулоқотда қўлланиладиган кўплаб новербал сигналлардан холи. Суҳбат чоғида одамлар ўз ҳиссиётлари ҳақидаги ахборотни кўзлар, юз ифодаси, овоз оҳанги кабилар ёрдамида узатади. SMS-ёзишувда бундай механизмлар йўқ. Бундай вазиятда одамлар ҳамсуҳбатининг кайфияти ҳақида смайликлар, атайлаб йўл қўйилган имло хатолари ва тиниш белгилари ёрдамида билиб олишига тўғри келади», — деди эксперимент раҳбари Селия Клин.
Бошқа бир лойиҳа доирасида эса Клин ва унинг ҳамкасблари ундов белгиси билан тугайдиган хабарлар анча самимий деб қабул қилинишини аниқлади.
Изоҳ (0)