«Ўзбекистон темир йўллари» акциядорлик жамияти ва Франциянинг Alstom компаниялари ўртасида англашув меморандуми имзоланди. Бу ҳақда «Ўзбекистон темир йўллари» матбуот хизмати хабар бермоқда.
Унга кўра, Alstom компанияси «Ўзбекистон темир йўллари» акциядорлик жамияти таркибига кирувчи Тошкент механика заводи базасида асинхрон тортишли электр двигателларини ишлаб чиқариш бўйича инвестиция лойиҳасини амалга оширади.
Хабар беришларича, меморандум 5—6 ноябрь кунлари Тошкент шаҳрида бўлиб Халқаро инвестициявий форумда имзоланган.
Қайд этиш жоиз, Ўзбекистон Президентининг 2015 йил 30 апрелдаги қарорига мувофиқ, Тошкент механика заводида тўрт йўналишда 38 лойиҳани амалга ошириш кўзда тутилган.
Маълумот учун, Alstom компанияси Франциянинг йирик машинасозлик компанияларидан бўлиб, энергетика ускуналари ва темирйўл транспорти қурилмаларини ишлаб чиқариш бўйича, Siemens ва Bombardier билан бир қаторда, жаҳондаги етакчи ширкатлардан бири ҳисобланади. 2009 йил март ойи ҳолатига кўра, компаниянинг буюртмалар портфели 45 миллиард доллардан ортиқ эди.
Изоҳ (0)