АҚШлик сенатор Стив Дейнс 22 июль куни Сенатда мажлис ўтказди. Унда давлат котибининг бошқарув ва ресурслар бўйича ўринбосари Майкл Ригас билан суҳбат олиб борилиб, Марказий Осиё табиий ресурсларининг аҳамияти ва Вашингтоннинг Россия палладийсига (металл) қарамлиги муҳокама қилинди.
Йиғилишда нутқ сўзлаган Дейнс Марказий Осиё табиий ресурсларининг аҳамиятини ҳам таъкидлаб, ҳудуддаги мамлакатлар билан мустаҳкам алоқалар йўлга қўйилиши лозимлигига урғу берган.
“Марказий Осиёга келсак, ҳудуд табиий ресурсларга бой. Аммо атрофда Россия, Хитой, Эрон, Афғонистон давлатлари жойлашган. Шунга қарамай, Осиё мамлакатлари иқтисодиётни модернизация қилиш ва Қўшма Штатлар билан муносабатларни яхшилаш учун жиддий ҳаракат қилмоқда. Мен сўнгги 14 ой ичида Марказий Осиёнинг 5 та давлатида бўлдим. Уларнинг барчаси АҚШ билан ҳамкорликни йўлга қўйиш истагини билдирди”, деган сенатор.
Шунингдек, мажлисда АҚШнинг Россия палладийсига қарамлигини камайтириш зарурлиги ҳам таъкидланган.
“Палладий — АҚШ ишлаб чиқариш саноатида фойдаланиладиган ниҳоятда муҳим металл. Жумладан, у ўқ-дорилар ишлаб чиқаришда, илғор электроника ва автомобилсозлик саноатида алоҳида аҳамият касб этади. Дунёда уни қазиб оладиган 3 та жой бор: Россия, Жанубий Африка ва Монтана. Америка таъминот занжирининг заифлигини ошириш учун руслар бозорни палладий билан тўлдирди, нархларни пасайтирди. Оқибатда Stillwater конининг 700 га яқин меҳнатсевар ходими ишдан бўшатилди.
Агар биз Россиянинг нархларни манипуляция қилишини чекламасак, Америка таъминот занжирлари янада заифроқ бўлиб бораверади. Бундан ташқари, Россия палладийси русларга Украина урушини молиялаштиришга ёрдам бермоқда”, деган Дейнс.
Изоҳ (0)