Ёз мавсумида жазирама туфайли кўпчилик ёпиқ бинода ёки машинада узоқ вақт қолишга мажбур бўлади, бу эса барча учун оғир синовдир. Замонавий технологиялар туфайли иссиққа қарши курашиш усуллари мавжуд ва бунда кондиционер ёрдамга келади.
Салқин ҳаво оқими остида бўлиш, албатта, жазирама иссиқдан азият чекишдан кўра яхшироқдир, бироқ кондиционер остида узоқ вақт қолиш соғлиққа салбий таъсир кўрсатади, одатда енгил шаклда, масалан, мушаклар яллиғланиши, синусит, гайморит ва жиддийроқ касаллик — легионеллёзга ҳам олиб келиши мумкин.
Легионеллёз нима ва нима учун шундай номланади? Бу ҳаво-чанг ва ҳаво-томчи йўли билан юқадиган юқумли касалликдир. Қўзғатувчи (легионелла) табиий муҳитда, масалан, сув ҳавзаларида, тупроқда яшайди ва одам учун хавф туғдирмайди.
Бироқ легионелла вентиляция шахталари, кондиционерлар, бассейнлар ёки жакузи каби сунъий муҳитда ҳам кенг тарқалган бўлиб, легионеллёз билан касалланиш хавфини оширади ва шунинг учун у техноген инфекциялар қаторига киради.
Бу касаллик оддий пневмонияга қараганда анча оғир кечади, бундан ташқари, легионеллёз ошқозон-ичак тракти, юрак ва буйраклар билан боғлиқ муаммолар билан ҳам намоён бўлиши мумкин.
Касалликнинг оғир ҳолати кўпинча нафас етишмовчилиги ва сепсис каби асоратларга олиб келади. Шунингдек, касалликнинг кечишини бир қатор омиллар, масалан, иммунитетнинг пасайиши, чекиш ва хавфли ўсмалар оғирлаштиради. Статистикага кўра, эркаклар аёлларга қараганда касалликка кўпроқ мойил. Легионеллёзга қарши вакцина мавжуд эмас.
Касалликка ўз вақтида ёки эрта ташхис қўйилиб, даво чоралари кўрилса, бемор 7-10 кунда соғайиб кетади.
Легионеллёзнинг олдини олиш учун кондиционер тизимини ўз вақтида тозалаш — филтрларни алмаштириш, антибактериал ишлов бериш, шунингдек, ишлаётган кондиционер остида узоқ вақт қолмаслик керак.
Изоҳ (0)