Ўзбекистонда 2016—2020 йилларда 40 та янги мусиқа ва санъат мактаби ишга тушади ва 58 та мусиқа ва санъат мактаби реконструкция қилинади. Ушбу мактабларнинг фаолиятини такомиллаштириш ҳақидаги Давлат дастури 20 ноябрь куни Президент Ислом Каримов томонидан тасдиқланди, деб хабар беради «Газета.uz».
Давлат раҳбари қарорида таъкидланишича, 2009—2014 йилларда Ўзбекистонда 278 та мусиқа ва санъат мактаби фойдаланишга топширилган. Янги Давлат дастури мусиқа ва санъат мактаблари тармоғини бундан кейин ҳам ривожлантириш, жумладан, мусиқа ва санъатнинг бошқа турлари билан шуғулланишни истовчи қишлоқ ҳудудларидаги болаларни янада кўпроқ жалб этишни кўзда тутади.
14,7 минг таълим олувчи учун мўлжалланган янги ва реконструкция қилинган мактаблар янги ўқув жиҳозлари ва анжомлар, мусиқа асбоблари, компьютер ва бошқа техникалар билан таъминланади.
Янги Давлат дастури ижросини мувофиқлаштириш учун бош вазир Шавкат Мирзиёев бошчилигида республика комиссияси ташкил этилди.
Изоҳ (0)