Марғилон шаҳрида кичик ёшли ўғлини 18 миллион сўмга сотган аёл жавобгарликка тортилди. Бу ҳақда «Ҳуқуқ» газетаси хабар бермоқда.
Маълум бўлишича, тўрт йил аввал оила қуриб, сўнг ажрашиб кетган аёлнинг турмушидан бир ўғли бўлган, у ота-онасининг уйини ташлаб келиб, Марғилон шаҳрида ижарада яшай бошлаган.
Аёл Марғилон шаҳридаги дугоналаридан бирига: «Бирорта асраб оладиган одам бўлса, ўғлимни берворардим», — деганида, дугонаси: «Квартираси бўш бойваччалар бор. Болангизни уйга алмашинг ё бир уйни пулига сотинг», — дея маслаҳат беради.
Орадан маълум вақт ўтиб, дугона боласидан воз кечишга тайёр онани ўзининг танишига рўпара қилади, она «харидор» билан савдолашиб, 18 миллион сўмга келишади.
«Харидор» бу ҳолат ҳақида ҳуқуқ-тартибот органларига маълум қилади. Марғилон шаҳридаги автошоҳбекатда она боласини «харидор»га топшириб, пулни олган вақтида холислар гувоҳлигида қўлга олинади.
«Суд одам савдоси жиноятига қўл урган, ўз боласини сотган аёлга тегишли жазо тайинлади. У оналик ҳуқуқидан маҳрум этилди», — деб ёзади «Ҳуқуқ» газетаси.
Изоҳ (0)