«Ўзбектелеком» акциядорлик компаниясининг ҳамкорлари тармоғидаги ишлар давом этмоқда. Бу ҳақда компания матбуот хизмати 31 октябрь куни маълум қилди.
«‘Ўзбектелеком’ АК ҳамкорлари тармоғида ишлар олиб борилиши муносабати билан 2015 йил 30 ноябрга қадар тақдим этилаётган интернет хизматлари сифати пасайиши мумкин», — дейилади компания хабарида.
Ўз навбатида, Ўзбекистон бозоридаги бошқа йирик интернет-провайдерлар, хусусан, Sarkor Telecom, TPS ва Sharq Telekom компаниялари «Ўзбектелеком»га асосланиб 1—30 ноябрь кунлари интернет сифати пасайиши мумкинлигидан огоҳлантирган.
Интернет-провайдерларнинг қарийб барчаси юзага келаётган «вақтинчалик ноқулайлик учун» «Ўзбектелеком» компанияси узр сўраётганини алоҳида қайд этиб ўтган.
Қайд этиш жоиз, «Ўзбектелеком» компанияси 2 сентябрь куни ўз «ҳамкорлари тармоғида олиб борилаётган ишлар» интернет сифати 1 октябрга қадар, 12 октябрь куни эса 31 октябрга қадар ёмонлашиши мумкинлиги ҳақида огоҳлантирган эди.
Маълумот учун, «Ўзбектелеком» Ўзбекистондаги энг йирик телекоммуникация оператори бўлиб, у мамлакатдаги интернет-провайдерлар ва мобил алоқа операторларига интернет-каналларни ижарага беради, интернет тармоғидан фойдаланиш хизматларини тақдим этади.
Изоҳ (0)