Altwork компанияси ўзининг илк маҳсулоти — ҳар қандай, хусусан, ётган ҳолда ишлаш имконини берувчи ишчи станция — Altwork Station’ни тақдим этди. Бу ҳақда TJ хабар бермоқда.
Ишланма муаллифларининг сўзларига кўра, Altwork Station «компьютернинг фаол фойдаланувчилари» — дастурчилар, дизайнерлар ва ёзувчилар учун мўлжалланган. Унинг нархи 5,9 минг доллар, бироқ компания маҳсулотнинг биринчи партиясини 3,9 минг доллардан сотишни режалаштирмоқда.
Ишчи станция бир неча ҳолатда туриши мумкин. Хоҳишга кўра, фойдаланувчи компьютердан турган ҳолда, қулай ўтириб олиб ёки ётиб фойдаланиши мумкин. Иш режимларидан бирига «ҳамкорлик» деб ном берилган — бунда мониторни ҳамкасблар томонга буриб, улар билан бирга ишлаш мумкин.
Сичқонча ва клавиатура сирғалиб тушиб кетмаслиги учун Altwork Station’нинг столи усти магнит билан қопланган. Станция унга ўрнатилган пульт ёрдамида бошқарилади, электродвигателлар ёрдамида ҳаракатга келтирилади. Қурилма нархининг қимматлиги сабаблари — у тўлиқ АҚШда ишлаб чиқарилади, унда мураккаб муҳандислик ечимлари ва қимматбаҳо мустаҳкам материаллардан фойдаланилган.
Изоҳ (0)