Футбол бўйича Ўзбекистон миллий терма жамоаси КХДРга қарши ЖЧ—2018 ва Осиё Кубоги—2019 саралаш учрашувида мухлислар ишончини оқлаши шарт. Бу ҳақда жамоа сардори, Россиянинг «Краснодар» клуби ярим ҳимоячиси Одил Аҳмедов маълум қилди, дея хабар бермоқда «Uff.uz».
Одил Аҳмедов «Краснодар» клуби матбуот хизмати билан қилган суҳбати давомида Ўзбекистон миллий терма жамоасининг саралаш босқичидаги иштироки борасидаги саволларга жавоб қайтарди.
«Менимча, сардорлик боғичи менга омад келтирмоқда. Яқинда Баҳрайнга қарши кечган баҳсда ҳужумга ўтдим ва жарима майдончасига киргач, жамоадошим менга аниқ пас узатди. Чап оёқда зарба бермоқчи эдим, аммо тўп ўнг оёғимга тегиб, йўналишни бироз ўзгартирди ва рақиб дарвозабони бундан чалғиб қолди. Аслида ўша вазиятда зарба ҳам ўхшамаганди, аммо тўп дарвозадан жой олди. Бу ерда омадсиз иш битиши қийин эди», — деди Аҳмедов.
Одил Аҳмедов Ўзбекистон миллий терма жамоасига бош мураббий этиб тайинланган Самвел Бабаян ҳақида ҳам фикр билдирди. «Энг аввало, Бабаян жуда кучли руҳшунос эканини айтиш лозим. У бутун жамоа билан ва ҳар бир футболчи билан алоҳида гаплашиб олди, ҳар бир ўйинчига керакли гапларни айта олди. Йигитлар ўз кучига яна ишона бошлади ва ижобий натижа ҳам ўзини узоқ куттириб қўймади», — деди ярим ҳимоячи.
Ўзбекистон миллий терма жамоаси сардорининг фикрича, 12 ноябрь куни КХДРга қарши бўладиган ўйин «6 очкога тортади». «Ўзбекистонда терма жамоанинг жаҳон чемпионатига чиқишини ҳамма орзу қилмоқда. Бунинг учун эса гуруҳда биринчи ўринни олиб, кейинги босқичга чиқиш шарт. КХДРга қарши кечадиган ўйинда бизни фақат ғалаба қаноатлантиради, ўйинга жиддий тайёргарлик кўрмоқдамиз. Шимолий Кореяга қарши кечадиган ўйинда мухлислар ишончини оқлашимиз шарт», — деди Аҳмедов.
Изоҳ (0)