Эрон олий раҳбари оятуллоҳ Али Хоманаий Теҳроннинг ядровий дастури борасида халқаро воситачилар «олтилиги» билан эришилган келишувни маъқуллади, шунингдек, келишувда белгиланган вазифаларни бажаришга киришиш ҳақида кўрсатма берди. Бу ҳақда «РИА Новости» хабар бермоқда.
Эрон президенти Ҳасан Руҳонийга йўллаган мактубида оятуллоҳ АҚШ ва Европа Иттифоқи Эронга нисбатан санкциялар бекор қилинганини эълон қилиши кераклигини таъкидлаган, шунингдек, келишувда бир қатор тузилмавий камчиликлар борлигидан огоҳ этган.
Эрон ва халқаро воситачилар «олтилиги» 14 июлга ўтар кечаси Теҳрон ядровий дастури бўйича келишувга эришган эди. Унга кўра, БМТ Хавфсизлик кенгаши, АҚШ ва Европа Иттифоқи томонидан Эронга нисбатан санкцияларни бекор қилиши эвазига Эрон томони ўз ядровий дастури фақат тинчлик мақсадларига йўналтирилганини исботлаб бериши керак.
18 октябрь, якшанба куни томонлар келишув бўйича ўзига олган мажбуриятларни бажаришга расман киришди, хусусан, ҳар икки томон бир қатор расмий баёнотлар берди.
Изоҳ (0)