Oyatulloh Xomanaiy Eronning xalqaro “oltilik” bilan yadroviy dastur bo‘yicha imzolagan kelishuvini ma’qulladi

Eron oliy rahbari oyatulloh Ali Xomanaiy Tehronning yadroviy dasturi borasida xalqaro vositachilar “oltiligi” bilan erishilgan kelishuvni ma’qulladi, shuningdek, kelishuvda belgilangan vazifalarni bajarishga kirishish haqida ko‘rsatma berdi. Bu haqda “RIA Novosti” xabar bermoqda.

Eron prezidenti Hasan Ruhoniyga yo‘llagan maktubida oyatulloh AQSh va Yevropa Ittifoqi Eronga nisbatan sanksiyalar bekor qilinganini e’lon qilishi kerakligini ta’kidlagan, shuningdek, kelishuvda bir qator tuzilmaviy kamchiliklar borligidan ogoh etgan.

Eron va xalqaro vositachilar “oltiligi” 14-iyulga o‘tar kechasi Tehron yadroviy dasturi bo‘yicha kelishuvga erishgan edi. Unga ko‘ra, BMT Xavfsizlik kengashi, AQSh va Yevropa Ittifoqi tomonidan Eronga nisbatan sanksiyalarni bekor qilishi evaziga Eron tomoni o‘z yadroviy dasturi faqat tinchlik maqsadlariga yo‘naltirilganini isbotlab berishi kerak.

18-oktabr, yakshanba kuni tomonlar kelishuv bo‘yicha o‘ziga olgan majburiyatlarni bajarishga rasman kirishdi, xususan, har ikki tomon bir qator rasmiy bayonotlar berdi.