Эронда Telegram мессенжерининг трафики тўлиқ блок қилинган. Бу ҳақда, «Газета.ru» хабарига кўра, сервис эгаси Павел Дуров Twitter’даги саҳифасида маълум қилган.
«Эрон Ахборот ва алоқа вазирлиги Telegram’дан уларни жосуслик ва цензура воситалари билан таъминлашни талаб қилди. Биз уларнинг талабини рад этдик, улар эса бизни блок қилди», — деб ёзади Дуров.
Дуровнинг маълум қилишича, Telegram дастурчилари марказий серверсиз «фойдаланувчидан фойдаланувчига» тамойили асосида ишлайдиган p2p-протоколини ишлаб чиқиши устида ишламоқда, бундай протокол Эрондаги каби блок қилиш ҳолатларини айланиб ўтиш имконини беради.
Аввалроқ украиналик сиёсатчилар, Viber мессенжерида носозликлар борлиги ҳақида хабарлар пайдо бўлганидан сўнг, оммавий равишда Павел Дуровнинг Telegram’ига ўтаётгани маълум бўлганди. Хусусан, Украина президенти Пётр Порошенко ҳам Telegram’дан фойдаланаётгани айтилмоқда.
Маълумот учун, Telegram мессенжерининг интернет-версияси компаниянинг Осиё-Тинч океани ҳавзасидаги серверларига киберҳужумлар уюштирилганидан сўнг, Хитой ҳудудида блок қилинган эди.
Изоҳ (0)