Микропроцессорлар ишлаб чиқариш бўйича жаҳондаги энг йирик компания — Intel Хитойнинг Далянь шаҳрида жойлашган ярим ўтказгичлар заводига бир неча миллиард доллар сармоя киритишини эълон қилди. 3DNews хабарига кўра, фабрика янги авлод хотира микросхемаларини ишлаб чиқаришга қайта йўналтирилади.
Bloomberg агентлигининг Америка корпорацияси баёнотига асосланиб хабар беришича, яқин уч—беш йил ичида Intel Хитойдаги корхонага 3,5 миллиард долларгача сармоя киритади, кейинчалик харажатлар миқдори 5,5 миллиард долларгача кўпайиши мумкин.
Даляндаги қиймати 2,5 миллиард долларга тенг завод фаолияти 2010 йилда бошланган. 2016 йилнинг иккинчи ярмида бу ерда доимий хотира-чиплари, хусусан, Micron билан ҳамкорликда тайёрланган 3D NAND чипларини ишлаб чиқариш кўзда тутилган.
2015 йилнинг июлида Intel ва Micron энергияга боғлиқ бўлмаган 3D Xpoint хотира-чипларини тақдим этганди, у NAND flash’дан 1000 баробар тезроқ ишлайди. 10 йилдан бери ишлаб чиқилаётган мазкур технология Intel стратегиясининг муҳим таркибий қисми ҳисобланади.
Изоҳ (0)