Франция пойтахти Париж шаҳрида дзюдо бўйича «Катта Дубулға» туркумига кирувчи йилнинг нуфузли мусобақаларидан бири бошланди. Дунёнинг кўзга кўринган полвонлари орасида Ўзбекистон дзюдочилари ҳам мазкур турнирда ўз имкониятларини синовдан ўтказяпти, деб хабар беради «Оламспорт».
Кеча, 17 октябрь куни эркаклар -60, -66 ва -73 кг вазн тоифаларида татамига чиқди. -60 кг вазн тоифасида Ўзбекистон шарафини ҳимоя қилган Шарофиддин Лутфуллаев ярим финалга қадар мағлубиятсиз етиб бориб, якунда бронза медали билан тақдирланди.
Шарофиддин ўз иштирокини иккинчи даврадан бошлади ва бу босқичда канадалик Серхио Пессоани мағлуб этди. Учинчи даврада туркиялик Бекир Озлудан устун келди. Чорак финалда бразилиялик Эрик Такабатакени мағлубиятга учратди.
Ярим финалда франциялик Винсент Лимарега имкониятни бой бериб қўйди. Бронза медали учун кечган баҳсда эса швейцариялик Людовик Чамартиндан устун эканлигини амалда исботлади.
-66 кг вазн тоифасида татамига чиққан Ўзбекистон терма жамоаси аъзоси Достонжон Холиқулов учинчи даврада мағлубиятга учради. Яқиндагина Тошкентда ўтган Гран-При турнири ғолиби Мирали Шарипов эса кутилмаганда илк босқичдаёқ мағлубият аламини тотиб кўрди.
Изоҳ (0)